About

06-01-2025

میئر کراچی بیرسٹر مرتضیٰ وہاب نے کہا ہے کہ پیپلزپارٹی اور مسلم لیگ (ن) میں ایسے اختلافات نہیں کہ ساتھ نہ بیٹھ سکیں، مسائل کا حل نکالا جانا چاہئے-

میئر کراچی بیرسٹر مرتضیٰ وہاب نے کہا ہے کہ پیپلزپارٹی اور مسلم لیگ (ن) میں ایسے اختلافات نہیں کہ ساتھ نہ بیٹھ سکیں، مسائل کا حل نکالا جانا چاہئے، کے ایم سی میں میرٹ کے مطابق 118 ملازمین کو ترقیاں دی گئی ہیں، عوام سے کئے گئے وعدوں کو وفا کریں گے، کراچی کی رونقوں کو بحال کریں گے ، ہم سب مل کر اس شہر کی خدمت کرنے کا عزم رکھتے ہیں، ان خیالات کا اظہار میئر کراچی نے پیر کے روز کونسل ہال کے ایم سی میں ملازمین کو پروموشن آرڈر تقسیم کرنے کے موقع پر خطاب کرتے ہوئے کیا، ڈپٹی میئر کراچی سلمان عبداللہ مراد، پارلیمانی لیڈر کرم اللہ وقاصی، ڈپٹی پارلیمانی لیڈر دل محمد، جمن دروان، پیپلز لیبر بیورو کے صدر اسلم سموں اور متعلقہ افسران بھی اس موقع پر موجود تھے، میئر کراچی بیرسٹر مرتضیٰ وہاب نے کہا کہ ترقی نوکری کا حصہ ہے لیکن کے ایم سی میں افسوسناک صورتحال یہ رہی ہے کہ 32 سال گزرنے کے باوجود بہت سے ملازمین کو ترقی نہیں دی گئی، پیپلزپارٹی نے آج یہ قدم اٹھایا ہے اور ملازمین کو قوانین کے مطابق ترقی دینے کا عمل شروع کیا ہے، آئندہ بھی ملازمین کو ترقی دینے کا سلسلہ جاری رکھا جائے گا، ایک سوال کے جواب میں میئر کراچی نے کہا کہ گزشتہ روز شاہ فیصل کالونی میں گٹر میں گر کر بچہ کے ہلاک ہونے کا واقعہ انتہائی افسوسناک ہے مجھے اس پر شدید دکھ ہے، گٹر کے ڈھکن لگانا ہمارا کام ہے لیکن چوری ہونے سے ہم نہیں بچا سکتے، اس کے لئے ضروری ہے کہ علاقے کے لوگ اور پولیس بروقت کارروائی کرے یہاں تو حال یہ ہے کہ گھر یا دفتر کے باہر رکھے ہوئے گملے بھی اٹھالئے جاتے ہیں، انہوں نے کہا کہ اگر موبائل کی چوری کو روکنا ہے تو پرانا موبائل خریدنے کو بند کرنا ہوگا، اسی طرح موٹر سائیکل کی چوری روکنی ہے تو جہاں پرانا سامان ملتا ہے اس بند کرنا ہوگا، میئر کراچی نے کہا کہ صوبائی اسمبلی کے حزب اختلاف کے رہنما علی خورشیدی کہتے ہیں کہ میں بدمعاش بن گیا ہوں وہ شاید بھول گئے ہیں کہ لوگوں نے اس شہر میں 12 مئی کو بھی دیکھا ہے اور شہر کے حالات کو بھی دیکھا ہوا ہے، میری اور سلمان عبداللہ مراد کی غلطی یہ ہے کہ ہم کام کررہے ہیں اور کام ہوتا ہوا نظر آرہا ہے، پہلے حافظ نعیم الرحمان نے چینلزپر صبح گیارہ بجے کا وقت لیا تھا پھر منعم بھائی نے جگہ لے لی اور اب علی خورشیدی اس ٹائم پر نظر آرہے ہیں، میئر کراچی نے کہا کہ ہم کراچی میں ترقی کا عمل رکنے نہیں دیں گے اور اس کی رونقیں بحال کریں گے، انہوں نے کہا کہ کے ایم سی کے ملازمین جنہیں ترقی دی گئی ہے وہ مجھ سے وعدہ کریں کہ وہ اس شہر کی ترقی میں ہمارا ساتھ دیں گے تاکہ لوگوں کے مسائل حل ہوں اور یہ شہر ایک بار پھر ترقی کی راہ پر گامزن ہو۔