About

میئرکراچی بیرسٹر مرتضیٰ وہاب نے کہا ہے کہ ربیع الاول بابرکت مہینہ ہے، رسول اکرم صلی اللہ علیہ وسلم کی آمد کی خوشی منانا ہر شہری کا حق ہے

میئرکراچی بیرسٹر مرتضیٰ وہاب نے کہا ہے کہ ربیع الاول بابرکت مہینہ ہے، رسول اکرم صلی اللہ علیہ وسلم کی آمد کی خوشی منانا ہر شہری کا حق ہے،ربیع الاول کے انتظامات کے سلسلے میں مختلف شہری اداروں کے ساتھ رابطوں کا سلسلہ جاری ہے،تمام مسائل حل کرنے کی کوشش کر رہے ہیں، علمائے کرام کی طرف سے ربیع الاول کے انتظامات کے حوالے سے مسائل کی نشاندہی اہمیت کی حامل ہے،تمام مسائل کو باہمی مشاورت اور متعلقہ اداروں کے ذریعے حل کیا جائے گا، ان خیالات کا اظہار انہوں نے منگل کی شام فریئر ہال سبزہ زار پر ربیع الاول کے انتظامات کے سلسلے میں منعقد ہونے والے اجلاس کی صدارت کرتے ہوئے کیا، اس موقع پر ڈپٹی میئر کراچی سلمان عبداللہ مراد، ایڈیشنل آئی جی خادم حسین رند، ایس ایس پی عرفان بہادر اور تمام دیگر ایس ایس پیز، پروجیکٹ ڈائریکٹر سندھ سالڈ ویسٹ مینجمنٹ بورڈ سید امتیاز شاہ، چیف ایگزیکٹو واٹر کارپویشن اسداللہ، میونسپل کمشنر افضل زیدی، کرم اللہ وقاصی ، دل محمد اور دیگر افسران و منتخب نمائندے بھی موجود تھے۔ اجلاس میں علمائے کرام اور ربیع الاول کے مرکزی جلوس اور محافل کے منتظمین نے میئرکراچی کو شہر کے مسائل سے آگاہ کیا اور فوری حل کی درخواست کی، بیشتر مسائل کا تعلق صفائی ستھرائی، ٹریفک انتظامات، لوڈ شیڈنگ، سڑکوں کی استرکاری، نالوں کی صفائی، پانی و سیوریج کے نظام کی درستگی سے تھا، میئر کراچی بیرسٹر مرتضیٰ وہاب نے کہا کہ شہر کے مسائل سے بخوبی واقف ہیں اور ان کے پائیدار حل کے لیے شہر بھر میں ترقیاتی کاموں کا سلسلہ شروع کیا ہوا ہے، ہماری بھرپور کوشش ہے کہ جلد سے جلد تمام کاموں کو مکمل کرلیا جائے، انہوں نے کہا کہ آئندہ ربیع الاول اور محرم الحرام کے انتظامات کے لئے اجلاس تین ماہ قبل منعقد کئے جائیں گے،ربیع الاول کے سلسلے میں بلدیہ عظمیٰ کراچی اپنے زیر انتظام مرکزی سڑکوں پر صفائی ستھرائی، روشنی اوراسترکاری کے کام کرے گی،ذیلی سڑکوں اور گلیوں میں انتظامات کرنا ٹاؤن انتظامیہ کی ذمہ داری ہے،انہوں نے کہا کہ ٹاؤن انتظامیہ اگر اختیارات نہ ہونے کا عذر پیش کرے تو شہری ان سے کہے کہ آئندہ ووٹ لینے نہ آئیں، میں فون پر دستیاب ہوں، علمائے کرام جونہی مسائل سے آگاہ کریں گے اسے فوری حل کیا جائے گا،انہوں نے کہا کہ آئندہ سال انشاء اللہ تمام مسائل پہلے سے حل کرلئے جائیں گے اور آخر میں یہ اجلاس صرف دعائیہ اجلاس کی شکل اختیار کرلے گا، اجلاس کے آخر میں دعا کرائی گئی، علماء کرام نے ربیع الاول کے انتظامات کے حوالے سے اجلاس میں مدعو کرنے پر میئرکراچی کا شکریہ ادا کیا۔