About

20-06-2025

میئر کراچی بیر سٹر مرتضیٰ وہاب اور کمشنر کراچی سید حسن نقوی کی مشترکہ صدارت میں کراچی بیوٹیفیکیشن ٹاسک فورس کا اجلاس

کراچی بیوٹیفیکیشن ٹاسک فورس نے شہر کی اہم کاروباری شاہراہ، آئی آئی چندریگر روڈ کی بین الاقوامی معیار پر تزئین و آرائش کے لیے نجی اور کارپوریٹ شعبے کو اشتراک کی دعوت دی ہے، اس منصوبے کا مقصد اس سڑک کو عالمی کاروباری مراکز جیسے وال اسٹریٹ کے طرز پر ترقی دینا ہے، ٹاسک فورس کا ایک اعلیٰ سطحی اجلاس میئر کراچی بیرسٹر مرتضیٰ وہاب اور کمشنر کراچی سید حسن نقوی کی مشترکہ صدارت میں منعقد ہوا جس میں نجی بینکوں، سیکورٹیز اینڈ ایکسچینج کمیشن آف پاکستان (SECP)اور دیگر متعلقہ اداروں کے نمائندے شریک ہوئے، اجلاس کے دوران ایک تفصیلی پریزنٹیشن دی گئی جس میں آئی آئی چندریگر روڈ کی مکمل بحالی کا ماسٹر پلان پیش کیا گیا، اجلاس میں بتایا گیا کہ طویل عرصے سے درپیش پارکنگ کے مسائل کے حل کے لیے بارہ دری پارکنگ سے آئی آئی چندریگر روڈ تک شٹل بس سروس شروع کرنے کی تجویز پیش کی گئی جس کے لیے نجی بینکوں سے تعاون حاصل کیا گیا ہے، اجلاس میں شریک مختلف مالیاتی و حکومتی اداروں نے منصوبے کی مکمل حمایت کا اظہار کیا اور اس پر فوری عملدرآمد کی ضرورت پر زور دیا، شرکاء نے پائیدار خوبصورتی اور مستقل دیکھ بھال کے لیے باقاعدہ مانیٹرنگ کمیٹیوں کے قیام کی بھی سفارش کی، منصوبے کو تکنیکی بنیادوں پر مزید مؤثر بنانے کے لیے NED یونیورسٹی کے ماہرین نے اپنی پیشہ ورانہ رائے اور جدید تجاویز پیش کیں۔ اجلاس میں ڈپٹی انسپکٹر جنرل ٹریفک محمد شاہ، میونسپل کمشنر کے ایم سی ایس ایم افضل زیدی (PAS)، ڈپٹی کمشنر جنوبی جاوید نبی، ڈائریکٹر میڈیا کے ایم سی دانیال سیال اور اسٹینڈرڈ چارٹرڈ، HBL، UBL، SECP، پاکستان ریلوے سمیت دیگر اداروں کے سینئر نمائندگان نے شرکت کی، یہ منصوبہ نہ صرف کراچی کے معاشی مرکز کو جدید خطوط پر استوار کرے گا بلکہ آئی آئی چندریگر روڈ کو ایک منظم، خوبصورت اور عالمی معیار کی کاروباری راہداری میں تبدیل کرنے کی جانب ایک عملی قدم ہے۔