About

05-01-2025

میئر کراچی بیرسٹر مرتضیٰ وہاب نے کہا ہے کہ سٹی وارڈنز اور فائر بریگیڈ کے شہداء جنہوں نے شہریوں کی جان و مال کے تحفظ میں اپنی جانوں کا نذرانہ پیش کیا وہ ہمارا فخر ہیں-،

میئر کراچی بیرسٹر مرتضیٰ وہاب نے کہا ہے کہ شہر کے لیے خدمات انجام دینے والی شخصیات ہمارے لیے سرمایہ ہیں، سٹی وارڈنز اور فائر بریگیڈ کے شہداء جنہوں نے شہریوں کی جان و مال کے تحفظ میں اپنی جانوں کا نذرانہ پیش کیا وہ ہمارا فخر ہیں، ان شہداء کو تمغہ کراچی کے پیش کرنے کا مقصد ان کی خدمات کو خراج عقیدت پیش کرنا ہے، ان خیالات کا اظہار میئر کراچی بیرسٹ مرتضی وہاب نے اتوار کے روز کراچی کے لیے خدمات انجام دینے والی شخصیات میں شہری اعزاز تمغہ کراچی تقسیم کرنے کی تقریب سے خطاب کرتے ہوئے کیا، ڈپٹی میئر کراچی سلمان عبداللہ مراد، ڈپٹی پارلیمانی لیڈر دل محمد، جمن دروان، میونسپل کمشنر افضل زیدی، منتخب نمائندے اور کے ایم سی کے محکمہ جاتی سربراہان اور افسران بھی اس موقع پر موجود تھے، میئر کراچی نے کہا کہ آج کی تقریب کا ہیرو میں نہیں وہ ہیں جنہوں نے قربانیاں دیں، تقریب میں موجود شہیدوں کے گھروالوں کی آنکھوں میں نمی دیکھ کر میری آنکھوں میں بھی نمی آگئی، انہوں نے کہا کہ کراچی کے لیے خدمات انجام دینے والی شخصیات اور شہداء کو خراج عقیدت پیش کرنے کا فیصلہ سٹی کونسل کے اراکین نے کیا اور آج بلدیہ عظمیٰ کراچی کی جانب سے پہلی تقریب کا انعقاد کیا گیا ہے، او ریہ فیصلہ کیا گیا ہے کہ ہر سال پانچ جنوری کو یہ تقریب منعقد کی جائے گی تاکہ اس شہر کو عظیم تر بنانے میں جن لوگوں نے کردار ادا کیا ہے، ان کی خدمات کو سراہا جاسکے، انہوں نے کہا کہ جو لوگ اپنی جانوں کا نذرانہ پیش کردیں اس سے بڑی کوئی خدمت نہیں ہوسکتی، میئر کراچی نے کہا کہ ہم شہر کے انفراسٹرکچر کی بہتری اور ترقیاتی کاموں کے ساتھ ساتھ کراچی کی تہذیبی اور ثقافتی سرگرمیوں کو بھی فروغ دیں گے، بلدیاتی امور کی انجام دہی کے ساتھ سا تھ کراچی کی تاریخی عمارات اور مقامات کو بھی بحال کریں گے، انہوں نے کہا کہ یہ شہر میرا نہیں بلکہ ہم سب کا شہر ہے ہم بغیر رنگ و نسل اس شہر کی خدمت کرتے رہیں گے، انہوں نے کہا کہ کراچی کے ساتوں اضلاع میں ترقیاتی کام جاری ہیں اور 2025 کراچی کی ترقی کا سال ہے، تمام ترقیاتی منصوبوں کے لیے کے ایم سی کے پاس فنڈز موجود ہیں، انہوں نے کہا کہ ماضی کی طرح نا تو ہم اختیارات کا رونا روئیں گے اور نا ہی فنڈز کا رونا روئے گے، عوام سے کئے گئے وعدوں کو پورا کریں گے اور کراچی کے عوام نے اگر ہمیں منتخب کیا ہے تو پیپلز پارٹی ایک ایک کارکن انہیں مایوس نہیں کرے گا، اس موقع پر میئر کراچی بیر سٹر مرتضی وہاب نے کراچی کی ممتاز شخصیات اور شہداء میں تمغہ کراچی تقسیم کئے۔