About

02-12-2024

بلدیہ عظمیٰ کراچی کے محکمہ کلچر اینڈ اسپورٹس کے زیر اہتمام میٹروپولیٹن فٹ بال کپ 2024 کے سلسلے میں اتوار یکم دسمبر کو کے ایم سی فٹ بال اسٹیڈیم میں کھیلے گئے-

بلدیہ عظمیٰ کراچی کے محکمہ کلچر اینڈ اسپورٹس کے زیر اہتمام میٹروپولیٹن فٹ بال کپ 2024 کے سلسلے میں اتوار یکم دسمبر کو کے ایم سی فٹ بال اسٹیڈیم میں کھیلے گئے پہلے کوارٹر فائنل میں کے ایم سی کی ٹیم نے ماڑی پور ٹائون کو پنالٹی ککس پر 5-4 سے شکست دے کر سیمی فائنل میں پہنچنے کا اعزاز حاصل کرلیا، مقررہ وقت میں میچ بغیر کسی گول کے برابر رہا تھا جس کے بعد قواعد کے مطابق پنالٹی ککس لگائی گئیں جس میں ماڑی پور ٹائون کی ٹیم صرف 4 گول کرسکی جبکہ کے ایم سی نے گیند کو5 مرتبہ جال کے اندر پہنچاکر یہ مقابلہ جیت لیا، دیگر تین کوارٹر فائنل پیر کے روز کھیلے گئے جن میں شاہ فیصل ٹائون اور بلدیہ ٹائون کی ٹیمیں کے ایم سی فٹ بال اسٹیڈیم میں مد مقابل آئیں جبکہ لیاری ٹائون اور گلشن ٹائون کے درمیان کوارٹر فائنل ککری فٹ بال گرائونڈ لیاری میں کھیلا گیا اور چوتھا کوارٹر فائنل آل برادرز فٹ بال اسٹیڈیم میں گڈاپ ٹائون بمقابلہ ملیر ٹائون کھیلا گیا ، کوارٹر فائنل میچز کو شہریوں کی ایک بڑی تعداد نے اسٹیڈیم میں آکر دیکھا اور کھلاڑیوں کے دلکش کھیل سے لطف اندوز ہوئے، کوارٹرفائنل جیتے والی ٹیموں کے درمیان سیمی فائنل کھیلا جائے گا جس کے بعد ٹورنامنٹ کے فائنل میں دو بہترین ٹیمیں مد مقابل آئیں گی اور فائنل جیتنے والی ٹیم کو ٹرافی سمیت 10 لاکھ روپے، دوسرے نمبر پر رہنے والی ٹیم کو 5 لاکھ روپے اور تیسرے نمبر پر آنے والی ٹیم کو ڈھائی لاکھ روپے نقد انعام دیا جائے گا، ٹورنامنٹ کے گروپ میچز کراچی کے ساتوں اضلاع میں واقع فٹ بال گراؤنڈز میں منعقد ہوئے جبکہ سیمی فائنل اور فا ئنل فلڈ لائٹس میں کھیلا جائے گا، ٹورنامنٹ میں سپروائز کرنے کے لئے بین الاقوامی تنظیم فیفا سے منظور شدہ ریفری اور دیگر ٹیکنیکل عملے کی خدمات حاصل کی گئی ہیں جبکہ سابق فٹ بالرز اور ماہرین کی مشاورت کو بھی یقینی بنایا گیا ہے تاکہ بلدیہ عظمیٰ کراچی کے تحت شہر میں منعقد ہونے والے اس پہلے میٹروپولیٹن کپ فٹ بال ٹورنامنٹ کو ہر اعتبار سے معیار کے مطابق بنایا جائے اور فٹ بال کے شائقین کو بہترین کھیل دیکھنے کو ملے۔