About

27-11-2024

میئر کراچی بیرسٹرمرتضیٰ وہاب نے کہا ہے کہ کسی بھی ادارے کی ترقی میں لیڈرشپ کا اہم کردار ہوتا ہے

میئر کراچی بیرسٹرمرتضیٰ وہاب نے کہا ہے کہ کسی بھی ادارے کی ترقی میں لیڈرشپ کا اہم کردار ہوتا ہے، نوجوان سیاستدان ہونے کے ناطے یہ سمجھتا ہوں کہ ہمارے لیڈرز بے باک فیصلہ کرنے سے ڈرتے ہیں، مجھے بیوروکریسی میں جدت نظر نہیں آتی، 90 کی دہائی میں ڈپٹی کمشنرز کے اطوار الگ تھے مگر اب ایسا نہیں ہے جبکہ نوجوان اور پر عزم آفیسرز ملک کی قسمت بدل سکتے ہیں جب تک سرکاری افسران جمود سے باہر نہیں نکلیں گے، تبدیلی نہیں آئے گی ،ان خیالات کا اظہار انہوں نے نیشنل انسٹیٹیوٹ آف پبلک ایڈمنسٹریشن (نیپا)کراچی میں منعقدہ سینئر مینجمنٹ کورس میں شریک سینٹرل سپیریئر سروس کے افسران سے خطاب کرتے ہوئے کیا، اس موقع پر نیشنل انسٹیٹیوٹ آف پبلک ایڈمنسٹریشن کراچی کے ڈائریکٹر جنرل ڈاکٹر سید سیف الرحمن اور دیگر افسران بھی موجود تھے، قبل ازیں ڈائریکٹر جنرل NIPA ڈاکٹر سید سیف الرحمن اور دیگر افسران نے نیپا پہنچنے پر میئر کراچی بیرسٹر مرتضیٰ وہاب کا استقبال کیا، میئر کراچی بیرسٹرمرتضیٰ وہاب نے نیشنل انسٹیٹیوٹ آف پبلک ایڈمنسٹریشن (نیپا)کراچی کے ڈائریکٹر جنرل ڈاکٹر سید سیف الرحمن کے ہمراہ پرچم کشائی کی اور پودا بھی لگایا، میئر کراچی بیرسٹرمرتضیٰ وہاب نے نیشنل انسٹیٹیوٹ آف پبلک ایڈمنسٹریشن کراچی میں سینئر مینجمنٹ کورس کے آفیسرز سے خطاب کرتے ہوئے کہا کہ کسی بھی شعبے میں مہارت تعلیم اور تجربے کی متقاضی ہے، خود میں نے دو سال لافرم میں پریکٹس کرنے کے بعد ہمت کرتے ہوئے اپنی لافرم بنائی تاکہ قانون کے میدان میں اپنی صلاحیتوں کو استعمال کرسکوں، انسان جہاں بھی جائے سیکھنے اور آگے بڑھنے کا عمل مسلسل جاری رہنا چاہئے، آج ہر شعبہ ہائے زندگی میں تبدیلی آرہی ہے، یہ جدت کا دور ہے، ہم خود کو زمانے کے ساتھ چلنے اور ترقی سے ہمکنار کریں گے تبھی دنیا میں ترقی و خوشحالی ہمارا مقدر بن سکے گی، میئرکراچی بیرسٹر مرتضیٰ وہاب نے کہا کہ بلدیہ عظمیٰ کراچی کی آمدنی بڑھانے کے لئے میں نے پرائیویٹ پارٹنر شپ کے ذریعے ٹیکس کلیکشن شروع کی تاکہ بلدیہ عظمیٰ کراچی کو اپنے پیروں پر کھڑا کرسکوں، موجودہ نظام کے تحت کراچی واٹر اینڈ سیوریج کارپوریشن اور سالڈ ویسٹ مینجمنٹ بھی میئر کے ماتحت ہے البتہ میرا کنٹرول ریلوے یا پورٹ قاسم میں نہیں ہے۔