About

11-11-2024

میئر کراچی بیرسٹر مرتضیٰ وہاب نے کہا ہے کہ قائد آباد برج پر آنے اور جانے والے دونوں ٹریکس کی مرمت و استرکاری کرکے ٹریفک کے لئے کھول دیا گیا ہے-

میئر کراچی بیرسٹر مرتضیٰ وہاب نے کہا ہے کہ قائد آباد برج پر آنے اور جانے والے دونوں ٹریکس کی مرمت و استرکاری کرکے ٹریفک کے لئے کھول دیا گیا ہے جس سے شہریوں کو قائد آباد، لانڈھی، پورٹ قاسم اور دیگر صنعتی اور رہائشی علاقوں میں آمدورفت کی سہولت حاصل ہوگی اور سڑک کی خستہ حالی کے باعث درپیش مسائل حل ہوں گے، اس علاقے میں انور بلوچ ہوٹل سے لے کر مرغی خانہ بس اسٹاپ تک سڑک کا تعمیراتی کام تیزی کے ساتھ مکمل کیا گیا ہے جس کا مقصد کم سے کم وقت میں شہریوں کو سہولت فراہم کرنا ہے، کراچی کے عوام کی خدمت کے لئے تمام دستیاب وسائل بروئے کار لائے جا رہے ہیں، بارشوں اور دیگر وجوہات کے باعث متاثر ہونے والی کراچی کی تمام بڑی سڑکوں اور شاہراہوں کی تعمیر و مرمت اور بحالی کا کام تیز رفتاری سے جاری ہے جبکہ صوبائی سالانہ ترقیاتی پروگرام کے تحت کراچی میں مزید تعمیراتی منصوبوں پر جلد کام شروع ہوگا، یہ بات انہوں نے قائد آباد برج کے دونوں ٹریکس کی بحالی کے کام کا جائزہ لیتے ہوئے کہی، میئر کراچی بیرسٹر مرتضیٰ وہاب نے کہا کہ بلدیہ عظمیٰ کراچی کے محکمہ انجینئرنگ نے انور بلوچ ہوٹل سے لے کر مرغی خانہ بس اسٹاپ تک قائدآباد برج پر آمدورفت کے دونوں راستوں کی مرمت و استرکاری کے علاوہ برج کو بھی ٹریفک کے لئے بہتر بنادیا ہے جس سے یہاں سے گزرنے والی ٹریفک کا سفری دورانیہ کم ہوگا اور ایندھن کی بچت ہوگی، اس کے علاوہ ٹریفک جام کے مسائل سے بھی محفوظ رہا جاسکے گا، انہوں نے سڑک کی تعمیر کے دوران تعاون کرنے پر شہریوں کا شکریہ ادا کیا اور کہا کہ اس علاقے میں برج اور سڑک کی خستہ حالی اور ٹوٹ پھوٹ کا نوٹس لیتے ہوئے محکمہ انجینئرنگ کو فوری طور پر قائد آباد برج پر انور بلوچ ہوٹل سے لے کر مرغی خانہ بس اسٹاپ تک سڑک کی بحالی و استرکاری کا کام فوری طور پر کرنے کی ہدایت کی تھی تاکہ شہریوں کے مسائل حل کئے جاسکیں، اس سڑک کی تعمیر سے ملیر ندی برج استعمال کرنے والے شہریوں کو بھی آمدورفت میں سہولت حاصل ہوگی، میئر کراچی بیرسٹر مرتضیٰ وہاب نے کہا کہ محکمہ انجینئرنگ کو ہدایت کی ہے کہ شہر میں جہاں بھی سڑکوں کی تعمیر و مرمت کا کام جاری ہے اسے تیزی کے ساتھ مکمل کیا جائے اور اس کے علاوہ دستیاب وسائل اور افرادی قوت کا بھرپور استعمال کیا جائے، بنیادی انفراسٹرکچر کو بہتر بناکر ہی شہرکو خوبصورت اور سرسبز بنایا جاسکتا ہے اور ماحولیاتی آلودگی سمیت دیگر مسائل پر قابو پانا ممکن ہے، انہوں نے کہا کہ صوبائی حکومت کے تعاون سے بلدیہ عظمیٰ کراچی کے تحت شہر میں جاری ترقیاتی کاموں کے سلسلے میں موثر حکمت عملی اختیار کی جا رہی ہے اور ہرممکن کوشش کی جا رہی ہے کہ جاری ترقیاتی کاموں کو بروقت مکمل کرکے شہریوں کو زیادہ سے زیادہ سہولیات فراہم کی جائیں اور اس کے ساتھ ساتھ تعمیراتی کاموں میں معیار کا بھی خصوصی خیال رکھا جائے۔